Potpredsjednica Šin Fejna Mišel O’Nil imenovana je za premijerku Sjeverne Irske čime se na toj vodećoj poziciji prvi put našla kandidatkinja iz redova irskih nacionalista.
Odluku o njenom imenovanju donio je regionalni parlament, pošto je rivalska Demokratska unionistička partija prekinula dvogodišnji bojkot vlade Sjeverne Irske, prenosi Rojters.
Prošle su tačno dve godine otkako je Demokratska unionistička partija (DUP) povukla svog premijera u znak protesta zbog dodatnih provjera i birokratskih procedura za robu koja se kreće između Sjeverne Irske i ostatka Velike Britanije, što je urušilo izvršnu vlast u Belfastu i blokiralo rad institucija.
Međutim, DUP je u ponedjeljak pristao da se vrati u sjevernoirski parlament Stormont, nakon dogovora sa vladom u vezi sa pozicijom Sjeverne Irske na unutrašnjem tržištu Ujedinjenog Kraljevstva.
Po prvi put je i Šin Fejn, republikanska, nacionalistička politička stranka, imenovala premijera jer je osvojila najviše mjesta na posljednjim parlamentarnim izborima održanim u maju 2022. godine.
